હાસ્ય દરબાર

ગુજરાતી બ્લોગ જગતમાં રોજ નવી જોક અને હાસ્યનું હુલ્લડ

જાગો સોનેવાલો –હરનિશ જાની.

જાગો સોનેવાલો  –હરનિશ જાની.

                                ભાષણ કેટલું લાંબું હોવું જોઇએ? આ સવાલનો જવાબ કોઇ વક્તાએ આપ્યો નથી કે વિચાર્યો નથી. પરંતુ ભાષણ આપતી વખતે તે વક્તા કાગળમાંથી ડોકું ઊંચું કરી ઓડિયન્સ તરફ જુએ તો તેમને તુરત જ સમજ પડી જાય. એક વક્તા દેશની જાગૃતિ પર પ્રવચન આપતા હતા.અને તેમની નજર પહેલી હરોળમાં ઊંઘતી સ્ત્રી પર પડી-તેમણે તેમનું ભાષણ અટકાવી, તેની બાજુમાં બેઠેલા ભાઇને કહ્યું,”આ તમારા પત્નીને ઉઠાડોને ! તે ભાઇ બોલ્યા. “તમે સુવડાવી છે. તમે ઉઠાડો.”

               આનો અર્થ એ લેવાનો કે અનિદ્રાનો રોગ દૂર કરવા કોઇનું પણ ભાષણ સાંભળવું જોઇએ. સામાન્ય રીતે તેમ કરવામાં ખર્ચ તો જરાય થતો નથી.ઉપરથી ચહા પાણી અને નસીબ હોય તો નાસ્તો પણ મળે. બીજા લોકોના ભાષણોનો બહુ પરિચય નથી,પરંતુ કોઇપણ ગુજરાતી સંસ્થામાં અપાતા ભાષણોને જોવાનો અનુભવ છે.તેને પુરેપુરું સાંભળવા જેટલી મારી ધીરજ નથી હોતી-પ્રસંગ જ્ઞાતીનો હોય,ભાષાનો હોય,ધર્મનો હોય ,કે પોલિટીક્સનો હોય  ત્યારે લોકોને માથે ભાષણો ફટકારવાની પ્રથા છે.જો આપણે એ ભાષણો છપાયેલા જોઇએ અને વાંચવા પ્રયત્ન કરીએ તો વાંચતાં કલાકેક લાગે.ત્યારે  વિચાર આવે કે જયારે આ પ્રવચન ચાલતું હશે ત્યારે કેટલા માઇના લાલ સાંભળતા હશે? હા, એક વ્યક્તિ જરૂર સાભળે છે, તે છે બોલનાર પછીનો વક્તા.તેને એમ કે આ પુરું કરે તો સારું. જેથી લોકોને ટોર્ચર કરવાનો આપણો વારો આવે.અને એના ભમરડાની જાળી તપતી હોય છે.                

                    ભાષણની વાત આવે તો અમારા રાજપીપળાના મહારાજા અવશ્ય યાદ આવે-મહારાજા રાજેન્દ્રસિંહજી વરસમાં એક વખત પોતાના પિતાશ્રીએ બંધાવેલી ભવ્ય ઇમારતવાળી હાઇસ્કુલની વિઝીટ મારતા. આઝાદી પછી દશ -પંદર વરસ સુધી પ્રજા,રાજાને માન આપતી. અમારી હાઇસ્કુલમાં મહારાજા આવે એટલે અમે ખુશ થઇ જતા.અમને સેન્ટ્રલ હોલમાં ભેગાં કરતાં-અમારા સંગીત માસ્તર પોતાની નોકરીની અગત્યતા જાળવવા,સ્કુલની છોકરીઓ પાસે ચાર પાંચ સ્વાગત ગીત ગવડાવતા. એકવાર પ્રિન્સીપાલે કહ્યું “હવે મહારાજા સાહેબ,પ્રેરણાદાયક  બે શબ્દો કહેશે.” મહારાજાએ બેઠા બેઠા કહ્યું-“નથી કહેવા”. પછી પ્રિન્સીપાલે જાહેરાત કરી કે “પ્રવચનની જગ્યાએ મહારાજાસાહેબે આપણાં વિદ્યાર્થીઓને દૂધ પીવાના સો રૂપિયાનું દાન કર્યું છે.”ભાષણના બદલે દૂધ મળે તો આપણે ખૂશ થવાનું ને ! મહારાજાનું આગમન અમે દર વરસે વધાવી લેતાં.અને મહારાજા સાહેબે આ પ્રથા દર વરસે ચાલુ રાખી હતી-હા, પાછલા વરસોમાં દૂધ મોંઘું થયું ત્યારે બસો રૂપિયાનું દાન કરતા.તે સમયમાં નવી નવી મળેલી આઝાદીને વધાવવા છાશવારે કોંગ્રેસી નેતાઓ પણ અમારી સ્કુલમાં પધારતા અને અમને કહેતા કે “તમે દેશનું ભવિષ્ય છો.” અને સાથે લાંબા લાંબા ભાષણો ઠોકતા અને પોતે બાપુજીના ખરા વારસદાર છે એમ અમને ઠસાવવા પ્રયત્ન કરતા. કોઇક કોંગ્રેસ નેતા તો એવું પણ ઠસાવતા કે એ પોતે ન હોત તો બાપુજીને આઝાદી હાંસલ કરતાં હજુ વાર લાગી હોત. હવે આ લોકોને કારણે અમારા મહારાજા અમને વ્હાલા વ્હાલા લાગતા. 

                 મારું માનવું છે કે પ્રવચનો થતાં હોય ત્યારે જે શ્રોતા, વક્તાની સામે ટગર ટગર જોતા હોય છે. તે સહેલાયથી હિપ્નોટાયઝ થઇ જાય છે અને તેમની આંખો બિડાય જાય છે.આમાંથી બચવું હોય તો બોલનાર સાથે આંખ જ નહીં મિલાવવી. આમાં સ્ટેજ પર બેઠેલાની સ્થિતી સૌથી દયાજનક હોય છે.ઊંઘ આવે તો આપણે તો ઓડિયન્સમાંથી ઊભા થઇને બહાર આંટો મારી આવીએ.પરંતુ સ્ટેજ પર બેઠાં બેઠાં ઝોખું પણ ન ખવાય અને ઉઠાય પણ નહીં.તેમાં સભાપ્રમુખનો તો મરો જ.તેમણે બધાંના બોરિંગ લેક્ચરો સાંભળવા પડે જો કે એમને મનમાં એક શાંતિ હોય છે કે છેલ્લે આ બધા અત્યાચારોનો બદલો લેવાની તક મળશે.

                     અમારે ત્યાં અમેરિકામાં તો પહેલીથી નક્કી હોય કે આપણે ફલાણા સંમેલનમાં મળીશું. ચા પાણી -ભોજનનું પણ  ત્યાં જ પતી જાય.અને પ્રેમથી મિત્રને પણ ભેટાય. એટલે આવા સમ્મેલનમાં હૉલ કરતાં બહાર વધુ લોકો હોય છે. તેમાં કોઇ ધાર્મિક કથામાં પણ એ જ દશા. કથામાં  તો લોકો સમજીને જ આવે છે કે આપણે રામ કે કૃષ્ણની વાતો સાત દિવસ સાંભળવાની છે. એટલે કંટાળાનો સવાલ જ નથી.એ કથામાં કોઇ થાક્યો પાક્યો ઊંઘતો હોય તો લોકો એના તરફ દયાદ્રષ્ટિ રાખી ઊંઘવા દે છે. મને સ્વામિનારાયણ મંદિરમાં જવાનું ગમે છે.એ જ મંદિર એવું છે કે જેમાં મારે મારી પત્ની સાથે બેસવું નથી પડતું. એટલે હ~ઓલમાંથી ઊઠીને બહાર જતાં કોઇ ન રોકે.અને જો બેસી રહીએ તો ધ્યાનના બહાને આંખો મીંચીને બેસવાનું અને માથું ટટ્ટાર રાખીને એકાદ ઊંઘ ખેંચી કાઢવાની.અમેરિકામાં ધાર્મિક કથાઓમાં પણ બહાર મિટીંગ તો ચાલતી જ હોય.

      પરંતુ લંડન જેવામાં તો હૉલની બહાર થોડું ચાલો, ત્યાં પબ મળે-જ્યાં બિયરની ચુસ્કીઓ લેતાં લેતાં મિટીંગ થાય અને આવી મિટીંગનો તો નશો જ  ઓર હોય છે.

                    આમાં ભાષણનો વિષય અગત્યનો છે. વિષયની વાત કરીએ તો વડોદરા યુનિ.માં ભણતો હતો ત્યારે પ્રો.રાનડેના બાયોલોજીના કલાસમાં મને કાયમ ઊંઘ આવતી.જયારે જુઓ ત્યારે તે “રાના ટિગ્રીના” પર બોલતા હોય આથી જ અમે તેમને “દેડકા સર” કહેતા.પ્રો.જી.કે.જી.જોષીના ઇંગ્લીશના પિરીયડમાં તો મને સપના પણ આવતા.અમારી ટેક્ષ બુક- વિલીયમ થેકેરેની “વેનિટી ફેર” તો સપનામાં જ પતી.સામાન્ય રીતે જોષી સાહેબ મારી આ ટેવ સહન કરી લેતા. ફ્ક્ત એક વખત કલાસમાંથી કાઢી મુક્યો હતો.અને હું બહાર નિકળતો હતો ત્યારે તે બોલ્યા-“ આઇ ડોન્ટ માઇન્ડ યુ સ્લીપીંગ, બટ આઇ હેઇટ સ્નોરિંગ.”પાછળથી મારા મિત્રે જણાવ્યું હતું કે મારા નસ્કોરાં બોલતા હતા.

              મને યાદ આવે છે,ભટ્ટ સાહેબ. અતુલ પ્રોડક્ટસમાં ,જીવનની મારી પહેલી નોકરી હતી. કોલેજ હજુ હમણાં જ પતી હતી .અને નોકરીનો અર્થ પણ મને ખબર નહોતી. ભટ્ટ સાહેબનો એક શિરસ્તો હતો. બધાં કેમિસ્ટને પોતાની ઓફિસમાં બોલાવી-પોતે બહુ કડક અને શિસ્તના ચાહક છે.એમ અમારા મગજમાં ઠસાવવા લાંબાં લાંબા લેક્ચર મારતા.ત્યારે તેમની આંખોમાં આંખ મેળવવી, એ બહુ જોખમની વાત હતી એટલે એ જ્યારે મને કોઇ પણ પ્રકારનું લેકચર આપતા હોય તો હું બારીની બહાર જોતો. એક દિવસે ભટ્ટ સાહેબે પૂછ્યું “હું બોલું છું ત્યારે બારીની બહાર શું જુઓ છો?” મેં કહ્યું કે “સાહેબ,આપણાં સિનીયર કેમિસ્ટ શાહ સાહેબે મને શિખવાડ્યું છે કે જયારે તમે સામે બેસાડીને લેક્ચર આપો તો બારી બહારના લીમડાના પાંદળાં ગણવાના.-બધાં કેમિસ્ટ તેમ કરે છે.અને મેં તો બુક પણ બનાવી છે.” બીજે દિવસે ભટ્ટ સાહેબે બારી બંધ કરાવી દીધી પણ લેક્ચર આપવાનું તો ચાલું જ રાખ્યું. જીવનમાંનો એ બોધપાઠ હવે પરણ્યા પછી

કામ લાગે છે. પત્ની જ્યારે પણ લાંબું લેક્ચર આપે છે તો ઘરની બહાર દેખાતા “ઓક ટ્રી” ના પાંદડાં ગણું છું.અને એ વાત હજુ પત્નીને કહી નથી-એ ડરથી કે  કદાચ બારણું  જ બંધ કરાવી દે તો?

                  એટલે વિષય ખૂબ અગત્યનું સ્થાન ધરાવે છે.ગુજરાતી ભાષાના પ્રવચનો ખૂબ ભારેખમ હોય છે.એક તો વિષય જ શુષ્ક-ફલાણા યુગની કવિતાઓ કે ગુજરાતી ભાષાનો ઇતિહાસ કે પછી ફ્લાણા કવિ કે લેખકની કૃતિઓનું રસ દર્શન. જ્યારે આવા વિષય સ્કુલ અને કોલેજમાં અભ્યાસક્રમમાં ભણવામાં આવતા ત્યારે નહોતા સાંભળતા. તો હવે સ્વેચ્છાથી સાંભળવા ગમે ખરા? ઊંઘવા માટે, કવિ સંમેલન નકામા.એક કવિની કવિતાથી કદાચ ઊંઘ આવતી હોય ત્યાં બીજા કવિ આવે એટલે ઊંઘ ઊડી જાય. અને જો કવિઓએ નક્કી કર્યું હોય કે બધાંએ બે કૃતિ વાંચવાની.અને જો કોઇ કવિ ત્રીજી કવિતા વાંચવા બેસી ગયા તો તેમના પર ચિઠ્ઠીઓ આવવા માંડશે. ઓડિયન્સમાંથી  નહીં પરંતુ પાછળ બેઠેલા બીજા કવિઓ તરફથી. એટલે આપણી આવતી ઊંઘ ઉડી જાય. અને તેમ ઓછું કોય તેમ લોકો વાહ વાહ કરી ને ઊંઘવા નહીં દે!

                     ભાષણ સાંભળવાની મઝા તો આપણાં વડા પ્રધાન શ્રી મનમોહન સિંહના ભાષણમાં. હું કહું છું કે “મનમોહનસિંહને કોઇ દુશ્મન જ નથી. કારણ કે એ શું બોલે છે તે જ કોઇને સમજાતું નથી. વળી તે હિંદીમાં  બોલે છે કે         ઇંગ્લીશમાં તે પણ સમજાતું નથી.” એ એમની જાતે નીચું ડોકું કરીને બોલ્યે જાય છે.મને તો લાગે છે કે દુનિયામાં સૌથી બોરિંગ પ્રવચનો દરેક દેશની પાર્લામેંટમાં થતા હશે. તેમ છતાં ઊંઘવા માટે પાર્લામેંટ નકામી.પુષ્કળ બૂમાબૂમ થતી હોય છે.આપણે ત્યાં તો વિરોધ પક્ષ વિરોધ કરવાનું નક્કી કરીને જ આવે અને ગાદી પર બેઠેલા પક્ષના પ્રધાન બીજા એમ.પી.ના માથામાં જાત જાતના આંકડા ફટકારે.એટલે એમ.પી. લોકોને ઊંઘ આવે ખરી ? મને લાગે છે કે એ ઊંઘ ઉડાડવા માટે જ આ સભ્યો,બૂમો પાડતા હશે. અને ગાળા ગાળી કરતા હશે.

                 છેલ્લે,કદી વિચાર્યું છે કે જે લોકોને ભાષણોમાં ઊંઘ આવતી હોય છે તે લોકો કરીના કપૂર સ્ટેજ પર બેસીને બીજું કાંઇ જ ન કરવાની હોય અને ફક્ત છીંકો ખાવાની હોય તો તેને જોતાં મટકું પણ નહીં મારે !

(નવનીત સમર્પણ માટે લખેલો….હરનિશ.)

9 responses to “જાગો સોનેવાલો –હરનિશ જાની.

  1. dhavalrajgeera ડિસેમ્બર 31, 2010 પર 7:25 પી એમ(pm)

    Our friend Mahendra said…
    ” જયોતિન્દ્ર દવે પારિતોષિક -સુશીલાને-, see the attached link.
    Harnishbhai,
    મને જણાવતા આનંદ થાય છે કે મારા નીકટના મિત્ર હાસ્ય લેખક (જે હાસ્યના વન મેન શો પણ કરે છે) શ્રી હરનિશ જાની( Yardville NJ.) ને એમનો તાજેતરમાં બહાર પડેલ નિબંધ સંગ્રહ “સુશીલા” ને ૨૦૦૯ માટે ગુજરાતી સાહિત્ય પરિષદે- જ્યોતિન્દ્ર દવે પારિતોષિકથી સન્માનિત કર્યો છે. મારી દ્રષ્ટિએ,આ પારિતોષિક કોઇ પણ હાસ્ય લેખક માટે ઉચ્ચતમ સન્માન ગણાય. અમેરિકન ગુજરાતીના નાતે વધુ આનંદ થાય એ સ્વાભાવિક છે.ખરેખર તો ડાય્સ્પોરાના લેખક્ની દેશમાં ગણતરી થાય એ આપણા માટે આનંદની વાત ગણાય. અને આપણે NRG મિત્રો માટે આ એક ગૌરવ રૂપ હોઈ શકે. એમના પહેલા હાસ્ય વાર્તા સંગ્રહ “સુધન” ને પણ ગુજરાતી સાહિત્ય એકેડેમી ગાંધીનગરે બીજા નંબરનો પુરસ્કાર આપ્યો હતો. માતા પિતાના નામ પોતાના પુસ્તકોને આપવાનો ગુજરાતી સાહિત્યમાં આ પહેલો પ્રસંગ હશે ! “સુધન”ની જેમ “સુશીલા” પણ વાચકોને ગમશે એની મને ખાત્રી છે. હાર્દીક અભિનંદન હરનીશભાઈ.
    પુસ્તક પ્રાપ્તી માટે હરનીશભાઈનો સંપર્ક એમની ઈ મેઈલ પર કરી શકાશે.
    “harnish Jani”

    મહેન્દ્ર શાહ.

    Like

  2. chandravadan ડિસેમ્બર 26, 2010 પર 6:20 પી એમ(pm)

    Read this Post !
    Fristly…CONGRATULATIONS , Harnishbhai, for the JYOTINDRA DAVE AWARD !
    Read the LIGHT sided VIEW of the LECTURE & the LECTURER.
    In your Journey & your Research, you have given several situations in INDIA..AMERICA…EMGLAND Etc.
    You touched TEACHERS….POLITICAL LEADERS….SHAHITYAKARO & KAVIO……& eventually the HOME ENVIRONMENT.
    But, hidden within this “Jokes” is the serious Message. Often the Lecturer has the Personal Agenda.
    Often, the Lecturer is “blind to the Fact that he/she is boring the Audience.
    So….let us go back to the Question Harnishbhai asked at the Beginning “Bhashan ketalu Lambu Hovu Joyae ?…
    The Bhashan need NOT be Long or Short….it may not filled with “unrealistic ideas” and being delivered to the “right & interested Audience”. If NOT….you are SURE to have the “sleepy” Audience.
    But the “uninterested or those had slept during the Lecture” are ALL ready to enjoy the Food !
    DR. CHANDRAVADAN MISTRY ( Chandrapukar)
    http://www.chandrapukar.wordpress.com
    Rajendrabhai..Nice of you to publish this as a Post !

    Like

  3. dhavalrajgeera ડિસેમ્બર 26, 2010 પર 4:48 પી એમ(pm)

    જ્યોતીન્દ્ર હ. દવેને ‘રણજીતરામ સુવર્ણચંદ્રક’ મળેલો. ગુજરાતી સાહિત્ય પરિષદે વળી ‘જ્યોતીન્દ્ર દવે પારિતોષિક’થી તમને સન્માનિત કર્યા. આ સિલસિલો આગળ વધતો રહે તો કેવું સારું! શુભેચ્છા પાઠવું છું અને અપેક્ષા સેવું છું કે હાસ્ય સાહિત્યને તમારા તરફથી હજુ પણ વધુને વધુ યોગદાન મળતું રહે કે જેથી ‘હરનીશ જાની પારિતોષિક’ ની ઘોષણા જલદી થાય!

    વલીભાઇ તમે તો સિક્ષર મારી- આવા અભિનંદન તો તમે જ આપી શકો- અને આ એક અનોખા અભિનંદન ગણાય- પરંતુ તમે મને એક નવી દ્રષ્ટિ બક્ષી-આવો વિચાર મને કદી નથી આવ્યો.આજે ને આજે-પત્નીએ ને બાળ્કોને આ આઇડિયા આપીશ કે જેથી-હરનિશ જાની સુવર્ણ ચંદ્રક – મારા ગયા પછી યોગ્ય વ્યક્તિને મળે- જુઓ મારામાં આ વિચારના પ્રણેતા વલીભાઇ મુસા છે- એટલે આમ અચાનક જ આપ આવા નેક કામમાં ભાગીદાર બનશો- જોયું ભગવાન કેવી કેવી રીતે કામ કરે છે-
    હવે તબિયત કેમ છે-ઓપરેશન પછી દસ વરસ જુવાન થૈ ગયાને!

    ‘હરનીશ જાની

    Like

  4. Valibhai Musa ડિસેમ્બર 26, 2010 પર 2:24 પી એમ(pm)

    હરનીશભાઈ
    અ ભિ નં દ ન
    વલીભાઈ

    તા.ક.

    આ ખુશખબરીની જાણ ‘જ્હોન’ અને ‘જનાર્દન’ને કરી કે નહિ!!! સુરેશભાઈ કોઈ એકને જાણે છે, બીજા ભાઈની ઓળખાણ મેં તેમને કરાવી હતી. તેમને પૂછી જોવાથી એ બંને વિષે તમે જાણી શકશો. હાલ તેઓશ્રી ઈન્ડીઆ વલસાડ ખાતે છે. 2010નું વર્ષ પૂરું થવા પહેલાં પહેલાં તેઓ મારા વતન કાણોદર (પાલનપુર) ખાતે Sweet Ball Tournament માં ભાગ લેવા માટે આવવાના છે.

    વળી નવી તા.ક. :

    જ્યોતીન્દ્ર હ. દવેને ‘રણજીતરામ સુવર્ણચંદ્રક’ મળેલો. ગુજરાતી સાહિત્ય પરિષદે વળી ‘જ્યોતીન્દ્ર દવે પારિતોષિક’થી તમને સન્માનિત કર્યા. આ સિલસિલો આગળ વધતો રહે તો કેવું સારું! શુભેચ્છા પાઠવું છું અને અપેક્ષા સેવું છું કે હાસ્ય સાહિત્યને તમારા તરફથી હજુ પણ વધુને વધુ યોગદાન મળતું રહે કે જેથી ‘હરનીશ જાની પારિતોષિક’ ની ઘોષણા જલદી થાય!

    Like

  5. dhavalrajgeera ડિસેમ્બર 25, 2010 પર 9:41 પી એમ(pm)

    Pragnaben Vyas says…

    સૌ પ્રથમ તો હાર્દિક અભિનંદન
    ન્યુયોર્કમા મૅરી ક્રિસ્ટમસ મનાવી તમારી પાસે ન્યુ જર્સીમાં જ છીએ ત્યાં બ્લીઝરની આગાહી વાંચી મૅરીલેંડ જવા નીકળી જઈ એ છીએ.પહેલા આવી તકલીફમાંથી પસાર થયા છે તેથી હવે જોખમ લેતા નથી
    કાલે વિગતે પત્ર લખશું.”

    Like

  6. dhavalrajgeera ડિસેમ્બર 25, 2010 પર 2:00 પી એમ(pm)

    હાર્દિક અભિનંદન, હરનીશભાઇ. ગુજરાતી સાહિત્ય પરિષદે આપને આપેલ પારિતોષિક સર્વ દૃષ્ટીએ યોગ્ય અને આજના સર્વોત્તમ હાસ્ય લેખકને ગયું છે તેનો અમને ઘણો આનંદ છે. ફરી એક વાર અભિનંદન!
    Capt.Naren Phanse

    Like

  7. dhavalrajgeera ડિસેમ્બર 25, 2010 પર 12:35 પી એમ(pm)

    Dear Vijay,

    Just Talked to Hansaben and Harishbhai for the Happy newyear and Best for 2011.And We greeted for the SUSHILA and Jyotindra Dave Paritoshak – Award!
    I have put the news in Hasyadarbar too.

    Rajendra
    http://www.bpaindia.org

    Like

  8. dhavalrajgeera ડિસેમ્બર 25, 2010 પર 12:32 પી એમ(pm)

    http://gadyasarjan.wordpress.com/2010/12/25/sushila-won-yotindra-dave-award/
    Editor
    Hasyadarbar

    ———- Forwarded message ———-
    From: harnish Jani
    Date: 2010/12/25
    Subject: શ્રી જ્યોતિન્દ્ર દવે પારિતોષિક-સુશીલા-ને.

    મિત્રો- મને જણાવતા આનંદ થાય છે કે મારા નિબંધ સંગ્રહ “સુશીલા”ને ૨૦૦૯ માટે ગુજરાતી સાહિત્ય પરિષદે- જ્યોતિન્દ્ર દવે પારિતોષિકથી સન્માનિત કર્યો છે. મારી દ્રષ્ટિએ,આ પારિતોષિક કોઇ પણ હાસ્ય લેખક માટે ઉચ્ચતમ સન્માન ગણાય. એનું મને ગૌરવ છે.અમેરિકન ગુજરાતીના નાતે વધુ આનંદ થાય .એ સ્વાભાવિક છે.આમાં તમારો ઘણો ફાળો છે. તમે લોકોએ જુદી જુદી રીતે કાયમ પ્રોત્સાહિત કર્યો છે અને ગાઇડ કર્યો છે. આપનો ખૂબ આભાર-. હજું હું એવો મોટો લેખક નથી બન્યો કે જે આ એવોર્ડ પાછો આપી દઉં. એટલે સહર્ષ સ્વીકાર્યો છે.આ સાથે તાજો જ નિબંધ (નવનીત સમર્પણ માટે લખેલો)અટેચ કરું છું ગમશે.
    ધન્યવાદ,
    હરનિશ.
    તા.ક. આ પુસ્તક તમે મેળવીને જાતે ચકાશી જુઓ કે આ પારિતોષિકને યોગ્ય છે કે નહીં ? ભારતમાં આ પુસ્તક હર્ષ પ્રકાશન અમદાવાદ પાસેથી મળી શકશે.અથવા કોઇપણ બુકસ્ટોર મેળવી આપશે .અને યુ.એસ.એ.માં મારી પાસેથી-Phone-609-577-7102.
    Merry Xmas-

    Like

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out /  બદલો )

Google photo

You are commenting using your Google account. Log Out /  બદલો )

Twitter picture

You are commenting using your Twitter account. Log Out /  બદલો )

Facebook photo

You are commenting using your Facebook account. Log Out /  બદલો )

Connecting to %s

%d bloggers like this: